Ministri Tahiri takoi përfaqësuesin e Ministrisë së Punëve të Brendshme të Mbretërisë së Bashkuar, z. Richard Riley

Prishtinë,   |   06/10/2017

Ministri i Drejtësisë, z. Abelard Tahiri, ka pritur në takim përfaqësuesin e Ministrisë së Punëve të Brendshme të Mbretërisë së Bashkuar, z. Richard Riley, të shoqëruar nga Ambasadori i këtij shteti në Kosovë, z. Ruairi O'Connell.


Gjatë këtij takimi, Ministri Tahiri e njoftoi z. Riley me prioritet e tij si Ministër i Drejtësisë, veçanërisht  shprehu përkushtimin e tij personal dhe të Ministrisë së Drejtësisë në luftën kundër krimit të organizuar dhe korrupsionit. Tutje, Ministri Tahiri, i bëri të ditur, z. Riley, se tashmë ka iniciuar edhe një paketë të rëndësishme ligjore siç është ajo e rishikimit të Kodit Penal dhe atij të Procedurës Penale që kanë për qëllim plotësimin e këtyre objektivave. 

Në anë tjetër, z. Riley, e përgëzoi Ministrin Tahiri për punën e tij të jashtëzakonshme, veçanërisht për inicimin e rishikimit të legjislacionit penal që ka si qëllim arritjen e rezultateve të matshme. Luftimi i krimit të organizuar dhe korrupsionit është sfidë për të gjitha shtetet, andaj kërkohet bashkëpunim dhe bashkërendim ndërshtetëror për t’u përballur me këto sfida të përbashkëta, tha  z. Riley. 

Ministri Tahiri e falënderoi Britaninë e Madhe për mbështetjen e vazhdueshme që po i jep institucioneve të Kosovës, sidomos Ministrisë së Drejtësisë. Gjithashtu ai shprehu gatishmërinë që këtë bashkëpunim do ta thelloj me aktivitete të cilat kanë për qellim forcimin e sundimit të ligjit, luftën kundër krimit të organizuar dhe korrupsionit në Kosovë.