Ministrja e Drejtësisë theksoi arritjet e deritanishme, përfshirë miratimin e Strategjisë Kombëtare për Mbrojtje nga Dhuna në Familje dhe bazat gjinore, dhe aktivizimin e Grupit Koordinues Ndërministror.

Ministrja Haxhiu ka rikujtuar hapat e shumtë që ka ndërmarrë Ministria e Drejtësisë në këtë drejtim, shumë prej të cilave ndodhin për herë të parë në këtë nivel. Ndër të tjera u theksua edhe fakti se Raporti i fundit i zbatimit për vitin 2023, tregon se 80% e aktiviteteve të Planit të Veprimit janë realizuar ose janë në proces zbatimi.

Përveç kësaj, Ministria e Drejtësisë ka lansuar Protokollin Shtetëror për Trajtimin e rasteve të Dhunimeve Seksuale, duke vazhduar trajnimin e zyrtarëve të mekanizmit koordinues në nivel lokal dhe duke krijuar modulet e trajnimeve për gjyqtarë, prokurorë dhe policinë. Një tjetër arritje e rëndësishme është lansimi i Programit të parë Kombëtar për Trajtimin e Kryerësve të Dhunës ndaj Grave, i cili tashmë po pilotohet në Qendrën Korrektuese në Dubravë.

Ministria e Drejtësisë ka bërë hapa të mëdhenj në drejtim të ndihmës juridike falas për viktimat e dhunës dhe ka përforcuar legjislacionin për kompensimin e viktimave të krimit. Ndihma juridike falas ka përfituar qindra qytetarë, duke përfshirë gra dhe burra, ndërsa fushatat si "16 ditët e aktivizmit kundër dhunës me bazë gjinore" kanë ndihmuar në ndërgjegjësimin publik dhe promovimin e dialogut për këtë çështje të rëndësishme. Ministria e Drejtësisë, së bashku me partnerët strategjikë, është e përkushtuar për të vazhduar me projekte inovative dhe bashkëpunime që adresojnë sfidat e mëtejshme në këtë fushë të rëndësishme, për të cilën ministrja Haxhiu kërkoi përkushtim të të gjithë akterëve e veçmas të atyre të sistemit të drejtësisë që të jenë vigjilentë dhe të përkushtuar në këtë drejtim.