Fillon puna në hartimin e amendamenteve kushtetuese për Vetingun

Në fjalën e tij, Kryeministri Kurti vlerësoi rëndësinë e reformës e cila po ndërmerret për sistemin e drejtësisë. Sipas tij, kjo reformë do të eliminojë mungesën e qasjes në drejtësi për qytetarët dhe do të garantojë rezultate cilësore dhe kthim të besimit të qytetarëve në drejtësi.

“Qeveria e Republikës së Kosovës përmes vetingut, do të përgjigjet në kërkesën e pashtershme të qytetarit për drejtësi dhe nevojën esenciale për ushtrimin e të drejtave të garantuara. Gjithashtu, do të krijojë hapësirën e domosdoshme, që Qeveria dhe institucionet shtetërore të vihen në shërbim të popullit e të mos krijojnë sundim mbi të” tha kryeministri Kurti.

Nga ana tjetër, ministrja Haxhiu në fjalën e saj theksoi rëndësinë e procesit të vetingut në sistemin e drejtësisë për të cilin tha se tashmë janë një hap më afër drejt materializimit të tij. Sipas ministres Haxhiu, secili qytetar i Republikës së Kosovës ka të drejtë të ketë një sistem drejtësie që lufton korrupsionin e shkeljet, një sistem drejtësie i cili është i pavarur nga faktorët e ndryshëm dhe që është efektiv në dhënien e drejtësisë.

Duke marrë parasysh gjendjen në të cilën gjendet gjyqësori dhe prokuroria, shtoi Haxhiu, reformën në drejtësi si të nevojshme dhe të domosdoshme e kanë parë qytetarët dhe për këtë vetingu është çelësi për të garantuar një sukses afatgjatë në këtë nismë që në thelb është produkt i ekspertëve të sundimit të ligjit e që ka përkrahjen e plotë të Qeverisë së Kosovës.

“Përmes këtij procesi, i cili do të mundësoj që brenda sistemit të drejtësisë të kemi gjyqtarë e prokurorë që kanë integritet të lartë moral e profesional, do të përdorim mekanizmin e vetingut për të garantuar një sistem drejtësie sa më afër me qytetarin, sa më të përgjegjshëm, sa më të parashikueshm, që secili qytetar – pa dallim, të marrë drejtësinë e duhur dhe në kohën e duhur” tha ministrja Haxhiu.

Sa i përket Koncept Dukumentit, ministrja Haxhiu theksoi se i njëjti na përballë me sfidat me të cilat përballet gjyqësori e prokuroria si dhe drejton në kornizën ligjore që është e nevojshme të adresohet.

Ministrja Haxhiu ka vlerësuar mbështetjen e ofruar dhe njëherit është shprehur e kënaqur që ky proces reformimi i sistemit të drejtësisë po zhvillohet në konsultim me ekspertët nga partnerët strategjikë si SHBA, Mbretëri e Bashkuar dhe Bashkim Evropian, duke i konsideruar praktikat më të mira përkitazi me standardet ndërkombëtare.

Ministrja Haxhiu në përmbyllje të fjalës së saj, falenderoi anëtarët e grupit punues të kryesuar nga z. Lulzim Beqiri, të cilët njëherit i ftoi që të angazhohen me përkushtim me qëllim të finalizimit të hartimit dhe finalizimin të legjislacionit për procesin e Vetingut si një ndër proceset më të rëndësishme për sistemin e drejtësisë.