Miratohet Drafti i Strategjisë për Sundimin e Ligjit 2021-2026 si dhe u votua Propozim-vendimi për njohjen e statusit të ish të Dënuarëve dhe të Përndjekurve Politik

“Ne parashohim që ky të jetë udhërrëfyesi kryesor për ne dhe për institucionet ndërkombëtare që duan të investojnë në Kosovë, për t’ua treguar atyre rrugën drejt së cilës duam të shkojmë. Ky proces, jo vetëm që u ka qëndruar ndryshimeve të vazhdueshme politike në vend, por gjatë gjithë kohës ka gëzuar edhe përkrahjen e pakusht të partnerëve tanë ndërkombëtarë” tha Ministrja Haxhiu.

Në prezantimin e saj ka sqaruar se Strategjia për Sundim të Ligjit përmban katër objektiva strategjike siç janë: fuqizimi i gjyqësorit dhe prokurorisë; fuqizimi i drejtësisë penale; fuqizimi i qasjes në drejtësi; dhe fuqizimi i luftës anti-korrupsion, si dhe indikatorët specifik për të matur arritjen e tyre gjatë viteve të ardhshme.

Ministrja shtoi se kjo strategji është nisma më serioze që Kosova e ka ndërmarrë drejtë avancimit të sundimit të ligjit me ç ‘rast ka falënderuar partnerët kyç me të cilët Ministria e Drejtësisë ka bashkëpunuar gjatë gjithë këtij procesi.

Ministrja Haxhiu në këtë mbledhje po ashtu ka paraqitur për shqyrtim dhe aprovim propozim – vendimin për emërimin e anëtarëve të Komisionit për njohjen e statusit të ish të Dënuarve dhe ish të përndjekurve politik.

“Njohja e statusit si dhe kompensimi i ish të Dënuarve dhe ish të përndjekurve politik është obligim ligjor. Por po ashtu është edhe shprehje e vullnetit dhe përkushtimit të Qeverisë së Republikës së Kosovës, që krahas përmbushjes së këtij obligimi i cili është dashur të përfundojë vite më parë, kjo kategori njerëzish të cilët kanë vuajtur nëpër burgjet dhe kazamatet e Serbisë, të ju njihet statusi i tyre, të ju njihet kontributi i tyre, dhe për më shumë shteti dhe shoqëria jonë, shprehet mirënjohëse dhe falënderuese për kontributin që ata kanë dhënë” ka thënë ministrja, Albulena Haxhiu.

Dy propozimet e paraqitura nga Ministrja e Drejtësisë, Strategjinë për Sundimin e Ligjit dhe propozim – vendimi për emërimin e anëtarëve të Komisionit për njohjen e statusit të ish të dënuarve dhe ish të përndjekurve politik, janë aprovuar në mbledhjen e Qeverisë të mbajtur sot me 11 gusht 2021.