Ministri i Drejtësisë Hajredin Kuçi, kërkoi bashkëpunim dhe koordinim edhe më të mirë në mes të Panelit për Lirim me Kusht, Shërbimit Korrektues dhe Shërbimit Sprovues të Kosovës

Ministri i Drejtësisë Prof. Dr. Hajredin Kuçi, i shoqëruar nga u.d. i drejtorit të Shërbimit Korrektues të Kosovës, z. Sokol Zogaj dhe drejtori i Shërbimit Sprovues të Kosovës, z. Bajram Bujupi, sot takuan znj. Emine Kaqiku, kryetare e Panelit për Lirim më Kusht, i cili funksionon në kuadër të Këshillit Gjyqësor të Kosovës.

Në takim u bisedua për rritjen e bashkëpunimit dhe koordinimit më të mirë të punëve mes Panelit për Lirim me Kusht, Shërbimit Korrektues të Kosovës dhe Shërbimit Sprovues të Kosovës.

Ministri Kuçi kërkoi nga Shërbimi Korrektues që raportet që i dërgohen për shqyrtim Panelit për Lirim me Kusht të jenë sa me profesionale, joselektive dhe të mbështetura në fakte në mënyrë që Paneli të merr vendimet e duhura në përputhje të plotë me ligjin.

Ai po ashtu kërkojë avancim të mëtutjeshëm të bashkëpunimit mes Panelit për Lirim me kusht dhe Shërbim Sprovues të Kosovës,  në mbikëqyrjen e personave që përfitojnë nga lirimi me kusht.

Ministri Kuçi duke i ofruar mbështetje punës së pavarur të  Panelit për Lirim me Kusht,  theksoi se do të verifikohen raportet dhe përgjegjësit e shkeljeve eventuale do të ndëshkohen.

Ministria e Drejtësisë do të respektojë të drejtat ligjore të burgosurve dhe në vazhdimësi do të vlerësojë sjelljen e tyre të mirë në Qendrat Korrektuese.