Ministri i Drejtësisë Prof. Dr. Hajredin Kuçi, i shoqëruar nga Peter Bach, Shef i Divizionit të Fuqizimit në EULEX-it, ka vizituar sot trajnimin për planifikim strategjikë të stafit menaxhues të SHKK-së.

Ministri Kuçi e ka vlerësuar këtë trajnim si një mundësi  të mirë për ngritjen profesionale të stafit të  SHKK-së, por ka theksuar se profesionalizmi duhet të shkojë bashkë me përkushtimin dhe guximin qytetar.

Ai ka vlerësuar edhe njëherë rolin e rëndësishëm që ka SHKK-ja për sigurinë e vendit dhe forcimin e besimit në drejtësi. Ministri Kuçi ka kërkuar  trajtim të barabartë të të burgosurve dhe ka nënvizuar  dy qëllime të rëndësishme për SHKK-në:

Vuajtjen e dënimit të të burgosurve në  përputhje me veprën që kanë kryer, si dhe risocializimin e të burgosurve dhe integrimin e tyre në shoqëri pasi të kenë kryer dënimin. 

“Të drejtat e të burgosurve  fillojnë dhe mbarojnë me ligj “ ka theksuar ministri Kuçi dhe ka kërkuar nga drejtuesit e SHKK-së që të mos tolerojnë toleruesit dhe shkelësit e ligjit të cilët dëmtojnë imazhin e SHKK-së dhe qesin në hije  punën e madhe dhe më përkushtim që bëjnë oficerët dhe gardianë e SHKK-së.

Ai u ka ofruar mbështetje të plotë drejtuesve të SHKK-së në angazhimin e tyre në zhvillimin dhe forcimin e SHKK-së, dhe i ka inkurajuar që të bashkëpunojnë ngushtë me EULEX-in dhe të gjithë partnerët tjerë, veçanërisht me mediat dhe shoqërinë civile. Duke ju uruar punë të suksesshme gjatë këtyre ditëve të trajnimit, Ministri Kuçi ka shprehur bindjen se këto njohuri të fituara do të implementohen në praktikë.