Ministri i Drejtësisë, Prof. Dr. Hajredin Kuçi, ka pritur sot në takim përfaqësues nga zyra e USAID-it, të udhëhequr nga drejtori i këtij misioni, Janes Hopes, me të cilët ka diskutuar për prioritetet në fushën e sundimit te ligjit. 

Gjatë këtij takimi u bisedua për vazhdimin dhe thellimin e bashkëpunimit dhe implementimin  e projekteve të përbashkëta në sektorin e drejtësisë. Përfaqësuesit e USAID-it kanë shprehur gatishmërinë për të mbështetur sektorin e drejtësisë përmes një varg projekteve siç janë; koordinimin e donatorëve, në të drejtën e pronës, efikasiteti, llogaridhënia dhe pavarësia e sektorit të drejtësisë, harmonizimi i ligjeve etj.   

Gjithashtu është diskutuar për asistencën e USAID-it në procesin e rishikimit strategjik të sektorit të Drejtësisë, si dhe janë shfaqur pikëpamjet lidhur me punën e deritanishme të suksesshme të USAID-it në fushën e sundimit te ligjit. 
 
Ministri Kuçi ka falënderuar përfaqësuesit e USAID-it për ndihmën që ka dhënë dhe po vazhdon të jep USAID në veçanti për Ministrinë e Drejtësisë. Ai ka prezantuar prioritete e MD-së, ndër të cilat duke i veçuar çështjet civile dhe nevojën për të bërë një vlerësim profesional të pavarur, të paanshme, dhe te gjithëmbarshëm të sektorit të drejtësisë.  
   
Në fund ishte qëndrim i përbashkët që të vazhdohet me tema të veçanta të grupeve teknike dhe që të ketë takime të rregullta të hartuesve të politikave.