Ministri i Drejtësisë,  Prof. Dr  Hajredin Kuçi, ka takuar sot drejtuesit e Shërbimit Korrektues të Kosovës (SHKK), me të cilët ka diskutuar për të arriturat  e këtij  shërbimi  dhe  vështirësitë me të cilat është ballafaquar ky institucion në vitin që po lëmë pas.

Po ashtu, në takim janë  diskutuar edhe  prioritetet dhe objektivat e këtij shërbimi për katër vitet e ardhshme. Ministri Kuçi pasi ka vlerësuar angazhimin dhe punën e këtij institucioni të rëndësishëm për sigurinë e vendit, ka kërkuar nga drejtuesit e tij më shumë angazhim, përgjegjësi, llogaridhënie dhe transparencë para publikut.

Veçanërisht është kërkuar rritja e transparencës në raport me kategorizimin dhe transferimin e të burgosurve, të cilët duhet të kenë trajtim të barabartë dhe të paanashëm në raport me ligjin dhe të drejtave  që u takojnë.

Po ashtu është kërkuar që të luftohen më me vendosmëri korrupsioni, nepotizmi dhe dukuritë tjera që dëmtojnë imazhin e këtij institucioni.

Ministri Kuçi, i ka ofruar SHKK-së mbështetjen e plotë në realizim e objektivave, rritjen e efikasitetit dhe avancimin e punës së këtij institucioni.

Rritja e besimit në drejtësi dhe në institucionet e drejtësisë është objektivi kryesor i Ministrit Kuçi në këtë mandat, dhe në funksion të këtij objektivi SHKK-ja do të ketë vëmendjen dhe mbështetjen e veçantë.