Zëvendësministri i Drejtësisë, Daut Xhemajli, sot ka pritur në takim përfaqësuesin e UNDP-së në Kosovë, Andrew Russell, me të cilën ka nënshkruar marrëveshjen “Statment of Intent”, e cila ka për qëllim rritjen e bashkëpunimit në mes të Qeverisë së Republikës së Kosovës dhe UNDP-së, në mbështetjen e Grupit  Punues për Ballafaqim me të Kaluarën dhe Pajtim në hartimin e Strategjisë Kombëtare për Drejtësinë Tranzicionale. Zëvendësministri Xhemajli tha se Qeveria e Kosovës ka miratuar një vendim me të cilin është themeluar Grupi Punues Ndërministror mbi ballafaqimin me të kaluarën dhe Pajtimin (GPNM), me qëllim të hartimit të një  Strategjie Kombëtare të Drejtësisë Tranzicionale, përmes së cilës do të adresohen të gjitha çështjet e rëndësishme. 

 “Ne besojmë se hartimi i Strategjisë Kombëtare është hapi i parë dhe kryesor në kuadër të Drejtësisë Tranzicionale që do t’i ndihmoj qytetarët të përballen më lehtë me të kaluarën. Konkretizimi i strategjisë në praktikë do të rezultoj me realizimin e të drejtave të qytetarëve të prekur nga krimet e luftës. Me nënshkrimin e këtij memorandumi, Qeveria e Republikës së Kosovës rikonfirmon mbështetjen e saj për Grupin Punues dhe për procesin e ballafaqimit me të kaluarën” ka thënë Xhemajli.

Përfaqësuesi i UNDP-së, Andrew Russell, tha se janë të kënaqur për nënshkrimin e një dokumenti kaq të rëndësishëm me qëllim të  bashkëpunimit në mes të Qeverisë së Republikës së Kosovës dhe UNDP-së në mënyrë që të ndihmojmë Grupin Ndërministror që merret me këtë çështjet relevante si pjesë e Drejtësisë Tranzicionale.  

“Shfrytëzoj rastin të shpreh përkushtimin e të gjitha agjencioneve të Kombeve të Bashkuara dhe UNDP-së, që të punojnë së bashku me Qeverinë e Republikës së Kosovës në mënyrë që të ndihmojmë Grupin Ndër-Ministror që merret me çështjet që ndërlidhen me proceset e Drejtësisë Tranzicionale dhe Ballafaqimin me të kaluarën. UNDP dhe Zyra e Komisionerit të Lart për të Drejtat e Njeriut do të punoj dhe do të vazhdoj të ndihmoj Qeverinë dhe Grupin Ndërministror duke përkrahur e asistuar me ndihmën e donatorëve, përfshirë këtu Qeverinë zvicerane dhe franceze” ka thënë Rusell. Qeveria e Republikës së Kosovës dhe UNDP, do të vazhdoj bashkëpunimin dhe mbështetjen për Grupin Punues Ndërministror por edhe për iniciativat tjera që kanë për qëllim të ndihmojnë në çështjet që ndërlidhen me Drejtësinë Tranzicionale.