Referimi i rasteve nga gjykatat në ndërmjetësimit do të sjell përfitim për qytetarët dhe zvogëlim të lëndëve për gjykatat. Kështu u tha në tryezën me temë, “Shkëmbimi i përvojave në referimin e rasteve nga gjykatat në ndërmjetësim”, e organizuar nga Ministria e Drejtësisë – Komisioni për Ndërmjetësin në mbështetje të UNDP-së, në të cilën morën pjesë ndërmjetës, gjyqtarë dhe akterë tjerë të ndërlidhur me këtë sistem.

Me këtë rast, Zëvendësministri i Drejtësisë, Abdyl Ymeri tha se në kuadër të reformave të vazhdueshme në sistemin e drejtësisë dhe prioriteteve të Ministrisë së Drejtësisë rol i veçantë i është kushtuar funksionalizimit dhe fuqizimit të sistemit të Ndërmjetësimit.

“Ligji për ndërmjetësim është i aplikueshëm që nga viti 2008. Komisioni për Ndërmjetësim është formuar dhe funksionon në kuadër të Ministrisë së Drejtësisë. Korniza legjislative lidhur me ndërmjetësimin ekziston, 89 ndërmjetës janë të trajnuar, certifikuar, licencuar dhe janë të regjistruar në regjistrin publik të ndërmjetësve”, tha Ymeri.

Përfaqësuesja e UNDP-së, Virxhina Dumnica, pasi ofroi mbështetjen e UNDP-së për sistemin e ndërmjetësimit, paraqiti rendësin e këtij sistemi në dy aspekte, në atë të përfitimit të qytetarëve dhe të zvogëlimit të lëndëve të gjykatave.

Në anën tjetër ndërmjetës nga komuna të ndryshme të Kosovës, paraqitën përvojat e tyre në rastet e zgjedhura me ndërmjetësim, ndërsa kërkuan referim me të madh të rasteve nga gjykatat në ndërmjetësim, si dhe informim me të madh të opinionit publik lidhur me rolin dhe rendësin e ndërmjetësimit.