Zëvendëskryeministri dhe Ministri i Drejtësisë, Prof. Dr. Hajredin Kuçi në ditën e parë të vizitës së tij në Bruksel, ka takuar komisioneren për Punë të Brendshme të BE-së, Cecilia Malmstrom, me të cilën ka diskutuar për sfidat e sundimit të ligjit në Kosovë, të arriturat e Qeverisë së Republikës së Kosovës në këtë fushë dhe për progresin të cilin Kosova e ka arritur gjatë këtyre muajve, të cilat do të merren në konsideratë në Raportin e Progresit të BE-së. 

Gjatë këtij takimi u tha së lufta kundër korrupsionit dhe krimit të organizuar mbeten sfidat esenciale me të cilat Kosova do të ballafaqohet, për çka pas bërjes së infrastrukturës tashmë ligjore, Kosova do t’i marrë të gjitha masat për t’i luftuar këto dy dukuri.

Me këtë rast, zëvendëskryeministri Kuçi shprehi gatishmërinë e Kosovës për rrugëtim drejt BE-së, por tha së Kosova dëshiron trajtim të barabartë dhe së patjetër që duhet të meritohet çdo integrim në BE. Gjithashtu zëvendëskryeministri Kuçi tha se udhërrëfyesi për liberalizim e vizave është tanimë i merituar nga ana e institucioneve të Kosovës dhe se presin ta kenë shumë shpejt të njëjtin. 

Nga ana tjetër  komisionerja Malmstrom theksoi se do të punojë ngushtë me Qeverinë e Kosovës në integrime evropiane dhe se Komisioni Evropian do ta trajtojë si partner të barabartë Kosovën dhe shtoi së KE gjatë shtatorit të këtij viti do ta dërgojë një komision të saj për sa i takon progresit në liberalizimin e vizave, për të parë mundësinë që të ecet sa më shpejt në këtë fushë, në mënyrë që Kosova të përfitojë udhërrëfyesin dhe sa më parë edhe vet liberalizimin.

Gjatë ditës, zëvendëskryeministri Kuçi ka takuar edhe  Stefano Sannino, drejtor i Përgjithshëm i Drejtoratit për Zgjerim të Komisionit Evropian.

Në këtë takim, u diskutua gjithashtu për nivelin e progresit që ka arritur Kosova, për sfidat në fushën e rendit dhe ligjit, për bashkëpunimin me EULEX-in, infrastrukturën ligjorë të Kosovës dhe për çështje të tjera sa i takon proceseve integruese dhe ligjore.