Me funksionalizimin e Institutit për Hulumtimin e Krimeve të Luftës, me datën 26 – 28 qershor 2011 delegacioni i përbërë nga Prof. Dr Zejnullah Gruda – drejtor, Akademik Dr. Pajazit Nushi – bashkëpunëtorë i lartë profesional , Uliks Emra – sekretar, kanë udhëtuar për një vizitë zyrtare në Republikën e Shqipërisë. Me këtë rast delegacioni ka zhvilluar takime të rëndësishme me Zv.ministrën e Drejtësisë, znj.Brikena Kasmi, kryetarin e Akademisë së Shkencave, z. Gudar Beqiraj, Drejtorin e Bibliotekës Kombëtare, z. Aurel Plasari si dhe drejtoreshën ekzekutive të Komitetit Shqiptar të Helsinkit, znj. Vjollca Mecaj.

Në këto takime temë e diskutimit ishte informimi mbi themelimin, arsyeshmërinë dhe synimet e Institutit , si dhe vendosja e bashkëpunimit me Institucionet e lartpërmendura në drejtim të sigurimit të ndihmës nga shtetit shqiptar me materiale dhe literaturë të nevojshme, ekspertë nga lëmitë e ndryshme, në drejtim të hulumtimit dhe zbardhjes së të vërtetës mbi krimet sërbe të  kryera në Kosovë.

Delegacioni është pritur ngrohtësisht dhe i është premtuar ndihma e parezervë e të gjitha institucioneve të shtetit shqiptar. Poashtu, palët ranë dakord që shumë shpejtë të nënshkruhet marrëveshje zyrtare ndërmjet ministrive respektive të drejtësisë, në mënyrë që të krijohet një burim i detyruar dhe të precizohen procedurat e shkëmbimit të informatave të rëndësishme, të cilat padyshim do të ishin shumë të mirëseardhura për misionin e Institutit.