Zëvendëskryeministri dhe ministri i Drejtësisë, Prof. Dr. Hajredin Kuçi u takua sot me Ministrin e Drejtësisë së Republike së Sllovenisë z. Aleš Zalar. 

Në këtë takim u bisedua për mundësitë e bashkëpunimit ndërmjet Ministrisë së Drejtësisë së Republikës së Kosovës dhe Mistrisë së Drejtësisë së Republikës së Sllovenisë, me theks të veçantë për shkëmbime përvojash dhe gatishmëri për të arritur marrëveshje për ekstradim, transfer, Akademinë e Drejtësisë, strategjinë e drejtësisë dhe çështjet civile.

Me këtë rast zëvendëskryeministri dhe ministri i Drejtësisë, Prof. Dr. Hajredin Kuçi, vlerësoi lart rolin e Sllovenisë dhe falënderoi për mbështetjen e vazhdueshme të Sllovenisë ndaj Republikës së Kosovës. 

Gjithashtu, ministri Kuqi shprehu gatishmërinë për të bërë përgatitjet e nevojshme teknike dhe profesionale që të arrihen marrëveshjet formale të bashkëpunimit në fushat e drejtësisë, duke u fokusuar në radhë të parë në formalizmin e marrëveshjeve për ekstradim, transfer dhe çështje civile. 

Ndërkaq, ministri i Drejtësisë së Republikës së Sllovenisë z. Zalar rikonfirmoi mbështetjen që po i jep Sllovenia Kosovës, mbështetje kjo e cila është e vazhdueshme në shumë sfera, sidomos në kuadër të bashkëpunimit rajonal dhe integrimeve evropiane. 

Të dyja palët u dakorduan për të bartur përvojat e ekspertëve slloven tek ata kosovar, gjithnjë duke i respektuar parimet dhe standardet e Komisionit Evropian.

Në fund, zëvendëskryeministri dhe ministri i Drejtësisë, Prof. Dr. Hajredin Kuçi dhe Ministri i Drejtësisë së Republike së Sllovenisë z. Aleš Zalar janë pajtuar për hapat e mëtejmë për ta vënë në funksion Deklaratën e takimit në Bordo, e cila do të vazhdohet me Marrëveshje Bilaterale.