Zëvendëskryeministri dhe ministri i Drejtësisë, Prof. Dr. Hajredin Kuçi, sot në Dubravë bëri përurimin e objektit për dëshmitarë të dënuar të mbrojtur, i cili i plotëson standardet më të larta ndërkombëtare.

Në ceremoninë e përurimit të këtij objekti, që është i pari në Republikën e Kosovës,  zëvendëskryeministri dhe ministri i Drejtësisë Kuçi theksoi se ndërtimi i këtij objekti ka qenë i domosdoshëm, sidomos pas miratimit në parim të Ligjit për dëshmitarët e mbrojtur, duke shtuar se Ministria e Drejtësisë përveç hartimit të legjislacionit dhe funksionalitetin e sistemit, po krijon kushte adekuate edhe për funksionalizimin e plotë të shërbimeve korrektuese. 

Ndërtimi i këtij objekti u financua nga buxheti i Ministrisë së Drejtësisë, në shumën prej 3 milion euro dhe ka kapacitet të mjaftueshëm për Republikën e Kosovës. Është i ndarë për dëshmitarë të gjinisë femërore dhe mashkullore dhe ka 30 dhoma me nga dy shtretër. 

Në objektin për dëshmitarë të dënuar të mbrojtur, edhe pse janë të paraparë të vendosen 60 persona, po pati kërkesa më të mëdha, ka hapësirë të mjaftueshme për vendosjen e 120 personave.

Në ceremoninë e përurimit të këtij objekti ishin të pranishëm përfaqësues të institucioneve të ndryshme vendëse dhe ndërkombëtare.