Ministria e Drejtësisë dhe KMDLNj nënshkruan memorandum mirëkuptimi

Zëvendëskryeministri dhe ministri i Drejtësisë, Prof. Dr. Hajredin Kuçi dhe drejtori ekzekutiv i Këshillit për Mbrojtjen e të Drejtave dhe Lirive të Njeriut (KMDLNj), Behxhet Shala, nënshkruan memorandum mirëkuptimi.

Ky memorandum i mirëkuptimit i nënshkruar në mes të Ministrisë së Drejtësisë dhe KMDLNj, ka për qëllim vazhdimin e marrëveshjes edhe për një vit, për monitorimin e punës së institucioneve si : Shërbimit Korrektues të Kosovës, Panelit për Lirim me Kusht, si dhe monitorimin e proceseve gjyqësore nga KMDLNj. 

Me anë të këtij memorandumi të mirëkuptimit, Ministria e Drejtësisë ndër të tjera, është e obliguar që anëtarëve të KMDLNj-së me seli në Prishtinë, t’u lejojë që të monitorojnë Qendrat Korrektuese, Qendrat e Paraburgimit dhe Zyrën e Panelit për Lirim me Kusht, të monitorojë në proceset gjyqësore në territorin e Republikës së Kosovës, në kohëzgjatje prej një viti dhe me mundësi vazhdim. 

Ndërsa, KMDLNj  ndër të tjera, është e obliguar që të përpilojë raportet mujore, në raste të veçanta edhe raporte pas monitorimeve të caktuara për institucionet e lartë përmendura dhe të njëjtat t’i dërgojë në Ministrinë e Drejtësisë, si dhe të përgatisë raportin vjetor për aktivitetet që dalin nga marrëveshja e nënshkruar dhe të njëjtin t’i dërgojë Ministrisë së Drejtësisë.