Zëvendëskryeministri dhe ministri i Drejtësisë, Prof. Dr. Hajredin Kuçi, shpalosi prioritetet për një funksionim sa më të mirë të SHKK-së

Zëvendëskryeministri dhe ministri i Drejtësisë, Prof. Dr. Hajredin Kuçi, u takua me Komisarin e Shërbimit Korrektues të Kosovës (SHKK) dhe Drejtorët e Qendrave Korrektuese e të Paraburgimit.

Në këtë takim, zëvendëskryeministri dhe ministri i Drejtësisë, Prof. Dr. Hajredin Kuçi, paraqiti prioritetet e tij për një funksionim sa më të mirë të SHKK-së. “Në fillim do të përpiqem që Ligjin për Ekzekutim të Sanksioneve Penale ta implementojmë në tërësi, me qëllim që të kemi një mbikëqyrje sa me të mirë të punës që bëhet në SHKK. Në kuadër të Ministrisë së Drejtësisë do ta themelojë inspeksionin për mbikëqyrjen e SHKK-së, si dhe do t’i themelojë sektorët e inteligjencës për luftimin dhe zbulimin e dukurive negative që mund të paraqiten në SHKK. Do të tentoj të zvogëlojmë lëvizjen e të burgosurve, transferimin prej një qendre korrektuese në një qendër tjetër, duke krijuar kushte të mira për të burgosurit, në përputhje me ligjin. Do të mundohemi të ngrisim shërbimet mjekësore në SHKK, po ashtu do mundohemi të bëjmë një menaxhim me të mirë në SHKK, duke zvogëluar shpenzimet, në veçanti në derivate, rrymë dhe shërbime tjera. Do të përpiqem që stafi i SHKK-së të ketë paga dinjitoze. Do mundohemi që Qendrën Korrektuese për Dënime të Shkurtra në Smrekovnicë ta bëjmë funksionale, dhe nëse na lejojnë mundësitë, këtë Qendër ta bëjmë të tipit të hapur. Do përpiqem që të krijojmë kushte sa me të mira në Qendrën Korrektuese për të Mitur në Lipjan”, tha zëvendëskryeministri dhe ministri i Drejtësisë, Prof. Dr. Hajredin Kuçi, dhe shtoi se në Qendrën Korrektuese në Dubravë, do të ngritet niveli i vëzhgimit me kamera. 

Zëvendëskryeministri dhe ministri i Drejtësisë, Prof. Dr. Hajredin Kuçi, tha se në bashkëpunim më Komisionin Evropian dhe Qeverinë e Kosovës, do të bëhen përpjekje për ngritjen e Burgut të Sigurisë së Larte.

Si prioritete tjera të zëvendëskryeministrit dhe ministrit të Drejtësisë, Prof. Dr. Hajredin Kuçi, janë edhe fuqizimi i Organizatave Joqeveritare në mbikëqyrjen e SHKK-së, si dhe ngritja e kapaciteteve arsimore, profesionale dhe e punësimit për të burgosurit.