Në kuadër të Procesit të Berlinit, për 3 ditë me radhë 9 – 11 tetor 2024 në Berlin të Gjermanisë, është organizuar forumi i diskutimit “Civil Society & Think Tank Forum 2024”.

Zëvendësministri i Drejtësisë z. Vigan Qorrolli, ishte pjesë e panelit për Sundim të Ligjit dhe luftimin e Korrupsionit.

Në fjalën e tij para të pranishmëve, zëvendësministri Qorrolli fillimisht theksoi perkushtimin e Republikës së Kosovës në sundimin e ligjit dhe luftimin e korrupsionit, duke numëruar edhe disa nga rezultatet e deritanishme të reformës në drejtësi në Kosovë të cilat sipas tij, vazhdojnë të kontribuojnë në forcim të sundimit të ligjit dhe luftim më efika të korrupsionit.

Tutje, zëvendësministri Qorrolli theksoi se Kosova është ndër vendet e para të Ballkanit Perendimor që ka miratuar Agjenden Evropiane të Reformave, duke u zotuar për zbatimin e obligimeve që rrjedhin nga paketa e tillë e reformave.

Sipas zëvendësministrit Qorrolli, rezultatet e deritanishme në sundim të ligjit dhe qeverisje të mirë, kanë reflektuar pozitivisht edhe në indekset ndërkombëtare për sundim të ligjit dhe kundër – korrupsion, duke pasqyruar Republikën e Kosovës ndër vendet me përparim në këtë drejtim.

Përveç sundimit të ligjit dhe luftimit të korrupsionit, Forumi ka trajtuar edhe tema të tjera në kuadër të Procesit të Berlinit si: Tregun e përbashkët rajonal, procesin integrues drejt BE-së, përfshirjen e komuniteteve në proces, energjinë dhe ndryshimet klimatike, çështjet gjinore dhe diversitetin, mbrojtjen e ambientit dhe zhvillimin ekonomik, ballafaqimi me të kaluarën dhe pajtimi, çështjet kibernetike dhe ato të dezinformimit, perspektivën e të rinjve, e të tjera.

Në forum ishin të pranishëm përfaqësues shtetëror të vendeve të Ballkanit Perëndimor, përfaqësues të shoqërisë civile, emisarë dhe ekspertë, e të tjerë.

Forumi është organizuar nga Instituti Aspen dhe Southeastern Europe, dhe është mbështetur nga Zyra e Jashtme Federale e Gjermanisë.