Në fjalën e tij, zëvendësministri Sallahu vuri theksin te vështirësitë që bizneset janë përballur në të kaluarën, përfshirë vonesat dhe mungesën e gjyqtarëve të specializuar për çështje komerciale. Ai potencoi se funksionalizimi i Gjykatës Komerciale është një hap jetik drejt përmirësimit të efikasitetit të sistemit gjyqësor, duke adresuar në mënyrë më të shpejtë dhe profesionale çështjet që prekin sektorin ekonomik.

“Kjo gjykatë përfaqëson një mundësi të jashtëzakonshme për të rritur besueshmërinë dhe shpejtësinë e zgjidhjes së mosmarrëveshjeve komerciale, duke ofruar siguri për bizneset dhe investitorët e huaj,” tha Sallahu, duke theksuar se një sistem gjyqësor efikas dhe i drejtë është kyç për tërheqjen e investimeve dhe për përmirësimin e klimës së biznesit në vend.

Zëvendësministri bëri të ditur se, përveç Gjykatës Komerciale, qeveria synon të avancojë më tej reformën në drejtësi përmes funksionalizimit të Gjykatës Administrative, duke siguruar mbështetje të mëtejshme për të drejtat e qytetarëve dhe bizneset.

Sallahu theksoi se angazhimi për një sistem drejtësie efikas është një përpjekje e vazhdueshme që do të ndikojë drejtpërdrejt në stabilitetin, besimin dhe zhvillimin ekonomik të vendit, duke garantuar një mjedis të qëndrueshëm për të gjithë qytetarët e Republikës.