Zëvendësministri i Drejtësisë, Vigan Qorrolli, sot ka kryesuar takimin e dytë me radhë të Grupit Ndërministror për Monitorimin dhe Zbatimin e Strategjisë për Drejtësi Tranzicionale, ku të pranishëm ishin edhe zëvendësministri i Financave, Punës dhe Transfereve, Avni Zogiani, zëvendësministri i Arsimit, Shkencës, Teknologjisë dhe Inovacionit, Arsim Ademi dhe zëvendësministrja e Shëndetësisë, Dafina Gexha Bunjaku.

Në fjalën e tij, zëvendësministri Qorrolli kërkoi nga anëtarët e Grupit Punues të intensifikojnë angazhimin e tyre në zbatimin e veprimeve që dalin nga Strategjia Tranzicionale për secilin dikaster, ngaqë sipas tij, kemi të bëjmë me një dokument të ndjeshëm, i cili kërkon mobilizim shoqërore dhe institucional për zbardhjen e shkeljeve të të drejtave të njeriut që kanë ndodhur në Kosovë në periudhën 1989-2000.

Gjatë takimit, ministritë dhe dikasteret përkatëse njoftuan lidhur me rrjedhën e aktiviteteve dhe zbatimin e tyre, sfidat dhe rekomandimet që dalin nga Strategjia, dhe po ashtu diskutuan për modalitetin e punës, trajnimet dhe kërkesat për bashkëpunimin me mekanizma ndërkombëtar për Drejtësinë Tranzicionale.

Ndër të tjerash, në këtë takim anëtarët e Grupit Punues u dakorduan për implementimin e objektivave dhe planin e veprimit në periudhën 10 vjeçare (2024-2034) të Strategjisë për Drejtësi Tranzicionale, me theks të veçantë zbatimin e veprimeve afatshkurte dhe afatmesme që përfshinë periudhën 2024-2026.

Të pranishëm në këtë takimin ishin edhe përfaqësues nga Ministria e Punëve të Jashtme dhe Diasporës, Instituti për Mjekësi Ligjore, Instituti Kombëtar për Shëndetësi Publike, Instituti për Krimet e Kryera Gjatë Luftës, Komisioni Qeveritar për Njohjen dhe Verifikimin e Statutit të Personave të Dhunuar gjatë Luftës, Instituti i Kosovës për Administratë Publike, Komisioni Qeveritar për Personat e Zhdukur, Agjencia e Punësimit të Kosovës, Agjencia për Menaxhimin e Monumenteve dhe Komplekse Memoriale, Policia e Kosovës, si dhe zyrtarë nga Ministria e Drejtësisë ndërsa të pranishëm nuk ishin përfaqësues nga Prokuroria Speciale dhe Këshilli Prokurorial i Kosovës.