Ora e parë e mësimit në shkolla: Të gjitha shkollat e Kosovës i kushtuan orën e parë diskutimit mbi dhunën në familje, dhunën ndaj grave dhe dhunën me bazë gjinore. Ministrja e Drejtësisë, Albulena Haxhiu, Ministrja e Arsimit, Shkencës dhe Teknologjisë, Arbërie Nagavci, dhe Deputetja Mimoza Kusari – Lila vizituan Gjimnazin “Ahmet Gashi” në Prishtinë për të bashkëbiseduar me nxënësit mbi parandalimin dhe raportimin e dhunës. Vilma Dule, një e mbijetuar e dhunës, ndau historinë e saj të fuqishme dhe inspiruese me nxënësit.

Thyerja e heshtjes: Fuqizimi i zërave nga Italia dhe Kosova: Ministrja Albulena Haxhiu mori pjesë në këtë aktivitet të organizuar nga Ambasada e Italisë dhe Fondacioni Jahjaga, duke bashkuar përpjekjet ndërkombëtare për luftimin e dhunës ndaj grave.

Klinika Mobile për komunitetet jo shumicë: Në, Qendrën e Komunitetit Mësimor në Brekoc të Gjakovës u mbajt një diskutim me gratë e komuniteteve Rom, Ashkali dhe Egjiptian mbi kujdesin ndaj shëndetit si dhe për raportimin e dhunës me baza gjinore. Në bashkëpunim me Ministrin e Shëndetësisë, ekipi mobil gjinekologjik ishte prezentë që të kryente ekzaminime falas për të gjitha gratë.

Ngjyrosja e trafove në Prishtinë me ngjyrën portokalli: Në bashkëpunim me KEDS-in, trafot e rrymës anekënd vendit janë ngjyrosur me ngjyrën e fushatës duke dhënë një mesazh të fuqishëm vizual për ndërgjegjësimin kundër dhunës ndaj grave.

Lansimi i 1 milion shisheve uji me mesazhin “Sot dhe Çdo Ditë Tjetër”: Në bashkëpunim me Korporatën Ujë Rugove, janë prodhuar një milion shishe me mesazhin ndërgjegjësues të fushatës, duke përhapur mesazhin në çdo tavolinë.

Emetimi i pullës postare “Sot dhe Çdo Ditë Tjetër”: Në bashkëpunim me Postën e Kosovës, është emetuar pulla postare “Sot dhe çdo ditë tjetër” si një simbol i përkushtimit institucional për këtë kauzë.

Mesazhe ndërgjegjësuese në faturat e energjisë: Për vitin e dytë radhazi, KEDS ka përfshirë mesazhe sensibilizuese në faturat e energjisë elektrike të muajit nëntor, duke përhapur fushatën në çdo shtëpi të Kosovës.