Zëvendësministri Qorrolli deklaroi në këtë forum se, Kosova ka bërë përparime të jashtëzakonshme në luftimin e trafikimit të qenieve njerëzore dhe kontrabandimit të migrantëve, pavarësisht sfidave të mos anëtarësimit në INTERPOL. “Pjesëmarrja e Kosovës në operacione të përbashkëta dhe shkëmbimi i informacionit janë dëshmi të përkushtimit tonë për të luftuar krimin e organizuar transnacional”, tha ai.

Në veçanti, mekanizmat e ndihmës së ndërsjellë juridike në çështjet penale dhe marrëveshjet si ato për ekstradim dhe transferimin e të dënuarve janë shembuj të qasjes së suksesshme të Kosovës për të forcuar bashkëpunimin në këtë fushë. Kontributi ynë përmes këtyre mekanizmave ndërkufitarë përfaqëson një model që mund të ndihmojë në harmonizimin e qasjeve brenda Ballkanit perëndimor dhe më gjerë.

Zëvendësministri Qorrolli, theksoi përveç tjerash se, “ne besojmë fuqimisht se një qasje e përbashkët do të krijojë një mjedis më të sigurt dhe më të drejtë për të gjithë qytetarët tanë, duke siguruar drejtësi për viktimat.”

Kësisoj, pjesëmarrja në këtë forum përfaqëson një mundësi të vlefshme për të adresuar sfidat e përbashkëta dhe për të identifikuar hapësira për përmirësim, përfshirë krijimin e strategjive të reja kundër krimit të organizuar dhe forcimin e mekanizmave për mbrojtjen e viktimave.