Gjatë bashkëbisedimit me stafin e qendrës, ministri Sallahu rikonfirmoi mbështetjen e Ministrisë së Drejtësisë për organizatën Terre des Homme, e veçanërisht në raport me funksionimin e kësaj qendre. Ai vlerësoi lart punën e koordinatorës, punonjësve socialë, psikologëve, mësuesës dhe ekipit mobil në terren, për ofrimin e shërbimeve që plotësojnë nevojat themelore të fëmijëve dhe familjes së tyre.

Në këtë qendër, ministri Sallahu pa nga afër hapësirat e veçanta në të cilat ofrohen shërbime të specializuara ditore për rreth 200 fëmijë nga komunitetet joshumicë. Shërbimet e ofruara nga kjo qendër përfshijnë vakte ushqyese, lojëra, aktivitete edukative dhe psikosociale, si dhe kurse të ndryshme dedikuar prindërve, të cilat ndikojnë në aftësimin dhe integrimin e tyre në fusha të ndryshme.