Ministrja e Drejtësisë, Albulena Haxhiu tha se në këtë ceremoni ne shprehim solidaritetin tonë dhe përkushtimin ndaj një shoqërie të drejtë, të barabartë dhe pa dhunë.

“Në kauzën tonë të përbashkët, sfidohemi të ndërtojmë një shoqëri ku drejtësia dhe barazia janë themelet e marrëdhënieve. Për të mundësuar këtë, kërkesë dhe adresë është fuqizimi i institucioneve dhe mekanizmave ligjorë që ndërhyjnë efektivisht për të ndaluar dhe ndëshkuar aktet e dhunës. Gjithashtu, është e rëndësishme të promovojmë ndërgjegjësimin dhe edukimin në shoqëri, duke nxitur dialogun mbi rolin e secilit në parandalimin dhe raportimin e rasteve të dhunës”

Fuqizimi i drejtësisë është thelbi i luftës sonë, tha ministrja Haxhiu, duke bërë të qartë se në Reformën e drejtësisë, një pjesë e rëndësishme është fuqizimi i sistemeve juridike dhe ndërhyrja efektive. Kjo përfshin hartimin dhe zbatimin e ligjeve të forta që penalizojnë dhunën në marrëdhëniet familjare dhe ato me bazë gjinore. Në krahasim me këtë, është gjithashtu e rëndësishme të sigurohet që viktimat kenë qasje të drejtë dhe të shpejtë në drejtësi, duke përfshirë mbrojtjen efektive dhe sigurinë e tyre, përmes ndihmës juridike falas, dhe mekanizmave të specializuar për t'i ofruar ata ndihmë psikosociale dhe përkrahje emocionale, potencoi ministrja Haxhiu.

Në kuadër të kësaj kampanje, Ministria e Drejtësisë do të organizojë mbi 80 aktivitete gjatë këtyre 16 ditëve.

Ministrja Haxhiu tha se angazhimi ynë këto ditë synon të zgjojë frymën në të gjithë shoqërinë për angazhim të përhershëm në ngritje të vetëdijes qytetare, për një shoqëri të emancipuar, me demokraci të zhvilluar, dhe me një sistem të drejtësisë efikas që garanton të drejtat dhe liritë për të gjithë dhe secilin.