Zëvendësministri i Drejtësisë, Naim Qelaj, që njëkohësisht bart postin e Koordinatorit Nacional për mbrojtje nga dhuna në familje, është shprehur kritik për deklarimet e institucioneve për dënimin e rasteve të keqpërdorimi të detyrës zyrtare, në rastet e fundit me persona të mitur, duke thënë se duhet të merren masa konkrete në parandalimin e rasteve të tilla.

“Unë jam ithtar i vlerësimit të çdo situate, pa dal me qëndrime të ngutshme. Gjatë vitit 2018 kemi pas raste mjaftë shqetësuese, të cilat fatkeqësisht janë shënuar edhe në fillim të këtij viti, rastet e abuzimit me të mitur. Institucioneve nuk u duhet vetëm me dënua këtë akt por duhet punuar me masa konkrete në forcimin e mekanizmave monitorues, llogaridhënies dhe përgjegjësisë. Shteti  ka obligim të garantoj siguri për secilin qytetar të tij. Aktet abuzive me detyrën, para se të dënohen duhet të parandalohen, sepse pasojat e akteve të tilla nuk po godasin vetëm viktimat që pa dyshim është pjesa me e dhimbshme, pot edhe vet institucionet”- tha, zëvendësministri Qelaj.

Shteti ka krijuar mekanizma mbrojtës nga keqpërdorimi i detyrës dhe  autoritetit zyrtar, por këto mekanizma duhet të pavarësohen nga  ndikimet dhe nga presioni, duhet të fuqizohen dhe të ju jepet autonomi në vendosje. Ne si shoqëri jemi mësuar të reagojmë pasi ndodhin rastet, por realisht duhet të reagojmë para se të na ndodhin raste të tilla, shtoi Qelaj.

Këto komente Zëvendësministri i Drejtësisë Naim Qelaj, gjatë takimit të grupit ndërministrorë  për mbrojtje nga dhuna në familje, të cilët i njoftoi edhe me punën që ka bërë në cilësinë e Koordinatorit Nacional për mbrojtje nga dhuna në familje, gjatë vitit 2018. Sfidë e përcjellë nga viti i kaluar mbete edhe më tej mënyra për financim të qëndrueshëm për strehimoret për viktimat e dhunës për familje. Edhe përkundër progresit të shënuar në këtë drejtim, që nënkupton afatin për thirrje për grante për strehimoret para muajit janar, mbetet ende për tu punuar në sigurimin e qëndrueshëm , që sipas koordinatorit Qelaj, do të mundësohet vetëm me ndryshim-plotësimin për financimin e pushtetit lokal më saktësisht përfshirjen në kuadër të granteve specifike për këtë çështje.

Koordinimi i aktiviteteve që trajtojnë temën e dhunës në familje, nga ana e institucioneve të vendit, agjencive të huaja dhe organizatave joqeveritare, të përfshira një kalendar të përbashkët të aktiviteteve, sipas Qelajt, do të sillte rezultate shumë më të larta se në të kaluarën. Prandaj ai kërkoi që të fillohet në hartimin e një kalendari të përbashkët për vitin 2019-të.

Po ashtu nga planet e viti 2018 të Koordinatorit Nacional për mbrojtje nga dhuna në familje, ishte edhe funksionalizimi i Bazës së integruat e të dhënave për rastet e dhunës në familje, që tashmë është funksionale por, që gjatë viti 2019 do të plotësohet sipas nevojave që do evidentojnë akterët që furnizojnë me të dhëna këtë bazë të dhënash.

Takimi i grupit ndërministror për mbrojtje nga dhuna në familje u zhvillua në  bashkëpunim me grupin për siguri dhe barazi gjinore, që udhëhiqet nga UNWOMEN  por që ka anëtarësi të gjerë të institucioneve të vendit, agjencive dhe organizatave joqeveritare vendëse dhe ndërkombëtare.