Kryeministri i Republikës së Kosovës, Albin Kurti sot ka emëruar Zëvendëskryeministren dhe Ministren e Drejtësisë, Donika Gërvalla në detyrën e Koordinatores Kombëtare për Mbrojtje nga Dhuna në Familje, Dhuna ndaj Grave dhe Dhuna me Bazë Gjinore.

Në këtë rol, Ministrja Gërvalla do të udhëheqë dhe koordinojë bashkëpunimin ndërinstitucional për forcimin e mekanizmave të parandalimit dhe adresimit të dhunës në familje dhe dhunës ndaj grave.

Me këtë rast, Kryeministri Kurti theksoi se Qeveria mbetet e përkushtuar në luftimin e dhunës, duke përmendur edhe veprimet konkrete që janë ndërmarrë në vitet e fundit, si mbështetja për strehimoret, avancimi i kornizës ligjore, zgjerimi i Ndihmës Juridike Falas për viktimat, miratimi i Ligjit për Kompensimin e Viktimave të Krimit dhe zbatimi i Strategjisë Kombëtare për Mbrojtje nga Dhuna në Familje dhe Dhuna ndaj Grave (2022- 2026).

“Përpjekjet tona për ta çrrënjosur dhunën ndaj grave dhe vajzave janë të vazhdueshme. Po e trajtojmë dhunën ndaj grave si përgjegjësi të përbashkët institucionale e shoqërore”, u shpreh Kryeministri Kurti.