Zëvendësministri Qorrolli prezantoi në panelin e parë me tematikën “Perspektivat rajonale: roli i mbështetjes së koordinuar rajonale dhe ndërkombëtare në forcimin e vlerave të qeverisjes së mirë”, ku prezantoi përvojën e Kosovës në avancimin e integritetit institucional, rritjen e transparencës dhe forcimin e sundimit të ligjit. Ai theksoi se lufta kundër korrupsionit mbetet një sfidë e përbashkët për vendet e rajonit dhe se asnjë shtet nuk ka kapacitetin ta përballojë i vetëm këtë dukuri të ndërlikuar. Prandaj, siç u shpreh ai, koordinimi i përhershëm ndërmjet qeverive, institucioneve ndërkombëtare, organizatave të shoqërisë civile dhe mediave hulumtuese është themelor për garantimin e qeverisjes së mirë dhe demokratike.

Në fjalën e tij, zëvendësministri Qorrolli, solli një panoramë të qartë të transformimeve që kanë ndodhur në Kosovë: nga miratimi i Pakos Ligjore Kundër Korrupsionit e deri te forcimi i kuadrit penal që ndalon mbajtjen në pozita të zyrtarëve të akuzuar për korrupsion. Ai veçoi në mënyrë të veçantë Ligjin për Byronë Shtetërore për Verifikimin dhe Konfiskimin e Pasurisë, duke e përshkruar atë si një instrument që synon rikthimin e besimit publik përmes goditjes së drejtpërdrejtë të përfitimeve të paligjshme. Sipas tij, ky ligj është shembulli më i qartë i një politike publike që bazohet në rezultate konkrete. Më tej, ai e theksoi rregullimin e avancuar të Agjencisë për Parandalimin e Korrupsionit dhe një sistem të ri rigoroz për deklarimin e pasurisë. Ai po ashtu nënvizoi rëndësinë e ndryshimeve në Kodin Penal dhe Kodin e Procedurës Penale, të cilat kanë ashpërsuar masat ndëshkuese dhe kanë krijuar mekanizma që parandalojnë mbajtjen në detyrë të zyrtarëve të akuzuar për korrupsion, duke ruajtur kështu integritetin e institucioneve publike.

Gjatë fjalës së tij, ai solli në vëmendje edhe rëndësinë e Ligjit për Byronë Shtetërore për Verifikimin dhe Konfiskimin e Pasurisë, si një instrument kyç për konfiskimin e pasurisë së pajustifikuar dhe si një politikë moderne që ndihmon në rivendosjen e besimit qytetar në sistemin e drejtësisë. Në vijim, Zëvendësministri Qorrolli foli mbi avancimin e procesit të Vetting-ut për drejtuesit e sistemit gjyqësor dhe prokurorial, i cili synon t’i garantojë publikut se drejtësia administrohet nga profesionistë me integritet dhe të pavarur nga çdo ndikim i jashtëm.

Ai vuri theks të veçantë tek roli i digjitalizimit në forcimin e qeverisjes së mirë, duke përmendur platformën E-Kosova si shembull konkret të mënyrës se si teknologjia ka reduktuar hapësirat për korrupsion dhe ka rritur transparencën në shërbimet publike dhe gjyqësore. Në të njëjtën linjë, ai rikujtoi rëndësinë e Ligjit për Sinjalizim, i cili ka vendosur standarde të reja për mbrojtjen e sinjalizuesve dhe ka fuqizuar rolin e qytetarëve në luftën kundër korrupsionit.

Zëvendësministri Qorrolli përmendi gjithashtu përmisimet e dukshme të Kosovës në vlerësimet ndërkombëtare, duke përfshirë ngritjen për 31 vende në Indeksin e Perceptimit të Korrupsionit të Transparency International, si dhe përparimin me 34 pozicione në Indeksin Global të Kriminalitetit, që e bën Kosovën vendin me nivelin më të ulët të kriminalitetit në rajon. Ai theksoi se këto rezultate pasqyrojnë angazhimin e institucioneve të Kosovës për forcimin e sundimit të ligjit dhe rritjen e sigurisë publike.

Në përmbyllje, Zëvendësministri i Drejtësisë theksoi përkushtimin e Kosovës për të vazhduar bashkëpunimin e ngushtë me partnerët ndërkombëtarë dhe vendet e rajonit, duke punuar drejt forcimit të mekanizmave të përbashkët për hetimin, ndihmën juridike ndërkufitare dhe luftimin e korrupsionit dhe krimit të organizuar. Ai ritheksoi se vetëm përmes koordinimit të qëndrueshëm dhe një vizioni të përbashkët rajonal mund të ndërtohet një Ballkan Perëndimor më i drejtë, më i sigurt dhe më i zhvilluar.