“Në një moment të tillë, në shenjë respekti për ata që, për vite me radhë, kanë qëndruar pranë të mbijetuarave dhe të mbijetuarve të dhunës seksuale gjatë luftës, duke u ofruar mbështetje, duke dokumentuar të vërtetën dhe duke mbrojtur të drejtën e tyre për drejtësi e dinjitet. Në kohë kur shumëkush heshti, ata zgjodhën të dëgjojnë. Në kohë kur stigma rëndonte mbi viktimat, ata zgjodhën t’u qëndrojnë pranë”, tha Ministrja Gërvalla.

Gjatë takimit, u vlerësua guximi dhe kontributi i Vasfije Krasniqi Goodman dhe Ramadan Nishorit, të cilët, duke thyer heshtjen dhe stigmën, kanë kontribuar në avancimin e ndërgjegjësimit shoqëror dhe institucional për këtë krim të luftës.

“Vasfije Krasniqi Goodman dhe Ramadan Nishori, me guximin e tyre të jashtëzakonshëm, i dhanë zë një dhimbjeje që për shumë vite ishte mbajtur në heshtje. Falë tyre dhe falë punës së palodhshme të organizatave që i mbështetën, shoqëria jonë ka bërë hapa të rëndësishëm drejt njohjes të së vërtetës dhe respektimit të dinjitetit të të mbijetuarve”, deklaroi Ministrja Gërvalla.

Po ashtu, u diskutua edhe për hapat konkretë që institucionet duhet të ndërmarrin për të siguruar qasje më të lehtë dhe më dinjitoze në realizimin e të drejtave të të mbijetuarve, përfshirë rishikimin e afateve për aplikim, lirimin nga taksat gjyqësore, krijimin e kushteve më të përshtatshme për funksionimin e Komisionit të Verifikimit dhe garantimin e një procesi që në çdo fazë respekton dinjitetin e tyre.

“Drejtësia për të mbijetuarit e dhunës seksuale gjatë luftës nuk është vetëm detyrim institucional. Është përgjegjësi shtetërore, morale dhe njerëzore. Republika e Kosovës ka për detyrë të vazhdojë të qëndrojë në anën e tyre, me respekt, me mbështetje dhe me përkushtim të palëkundur për të vërtetën, dinjitetin dhe drejtësinë”, tha Ministrja Gërvalla.