Ministrja Haxhiu priti në takim ambasadorin gjerman në Kosovë, përfaqësues të Odës Federale të Noterëve dhe të Unionit Ndërkombëtar të Noterisë (UINL)

Në takim u diskutua për sistemin noterial në Kosovë, sfidat dhe problemet kryesore me të cilat ballafaqohet sistemi i noterisë në vend. Krahas këtij diskutimi, ambasadori gjerman dhe të pranishmit e tjerë, theksuan se Ambasada Gjermane në Kosovë, Oda Federale e Noterëve, si dhe Unionit Ndërkombëtar i Noterisë, do ta përkrahin Ministrinë e Drejtësisë përmes këshillimit.

Ministrja Haxhiu, pasi që falënderoi ambasadorin dhe delegacionin për mbështetjen e ofruar, theksoi se Ministria e Drejtësisë është në pritje të vendosjes nga Gjykata lidhur me kontestimin e vendimit të saj për anulimin e procesit të zgjedhjes së noterëve të rinj për shkak të parregullsive. Më tej, ministrja theksoi se, në rast të përsëritjes së këtij procesi do të ishte e mirëpritur përfshirja në të njëjtin proces e Odës Federale të Noterëve dhe Unionit Ndërkombëtar të Noterisë. Ministrja Haxhiu, po ashtu theksoi se rishikimi i kornizës ligjore të sistemit noterial, ashtu si dhe fuqizimi i mekanizmit të mbikëqyrjes së punës së noterëve në Kosovë janë të rëndësisë së veçantë. Veç kësaj, ministrja e Drejtësisë njoftoi se është duke u punuar për digjitalizimin e sistemit noterial në Kosovë dhe se kjo pritet të lehtësojë shumë ofrimin e shërbimeve të mira nga noterët dhe të rrisë sigurinë e ofrimit të këtyre shërbimeve.

Në fund, ambasadori gjerman dhe pjesa tjetër e delegacionit shprehën mbështetjen e tyre për ministren Haxhiu lidhur me temat e diskutimit si dhe e ftuan atë dhe stafin e saj për vizitë në shtetin e Gjermanisë, me qëllim të njoftimit drejtpërdrejt me praktikat e noterëve në Gjermani dhe mënyrën e funksionimit të sistemit noterial atje, kjo me qëllim të ndarjes së përvojave dhe ideve për fuqizimin dhe përmirësimin e sistemit të noterisë në Kosovë.