Ministri i Drejtësisë Prof. Dr. Hajredin Kuçi, ka marrë pjesë në tryezën e organizuar nga Rrjeti Ballkanik i Gazetarisë Hulumtuese (BIRN), që ka publikuar raportin vjetor të monitorimit të gjykatave për vitin 2014.

Gjatë kësaj tryeze, Ministri Kuçi e ka vlerësuar si shumë të rëndësishëm publikimin e këtij raporti, përmes së cilit është bërë një vlerësim i punës së gjykatave dhe njëherit, sipas tij, ky raport ka krijuar një perceptim më real të punës së secilit nga institucionet dhe dikasteret përkatëse.

Ministri Kuçi ka vlerësuar që secili nga akterët përgjegjës duhet ta ruajnë dhe forcojnë besimin në drejtësi. Kuçi tha se, edhe ky raport ka për qëllim jo vetëm t’i vë në pah dobësitë e sistemit të drejtësisë,  por edhe t’i përmirësojë ato, duke forcuar besimin në drejtësi.

“Rritja e besimit të qytetarëve në drejtësi është puna jonë, detyra dhe qëllimi ynë. Fillimisht, gjyqësia dhe prokuroria, duhet të jenë të pavarura, dhe për këtë kemi krijuar mekanizma ligjor ku edhe emërimi dhe disiplinimi i tyre të bëhet nga vet gjyqësori dhe prokuroria, por pavarësia duhet të jetë reale, mbi të gjitha duhet të jetë e perceptuar drejtë si dhe e definuar qartë se kjo është pavarësi,” ka thënë Kuçi.

Kuçi ka theksuar se, gjyqësia profesionale është një nga kushtet kryesore për fuqizimin e besimit në drejtësi. Trajnime më të kompletuara të gjyqtarëve dhe prokurorëve, sidomos në disa fusha më të reja për sistemin e drejtësisë, duke përfshirë këtu kriminalitetin kibernetik, duhet të jenë pjesë e përmirësimit të përformancës së secilit prokuror dhe gjyqtar. Kuçi tha se, në veçanti, duhet ta kemi parasysh jo vetëm Institutin Gjyqësor, por edhe bashkëpunimin me shtetet e tjera të cilat kanë një përvojë të tillë.

Në ndërkohë, Kuçi gjithashtu ka sugjeruar që në raportin e ardhshëm duhet të vlerësohet performanca, që nuk nënkupton se sa lëndë janë kryer, por edhe atë se sa nga to janë kthyer në shkallën e dytë, sa nga to janë efektive dhe sa nga to  kanë rezultuar me sukses.

Për të ngritur performancën dhe llogaridhënien e gjyqtarëve dhe prokurorëve, Ministri Kuçi ka theksuar se gjatë këtij mandati do të pavarësojë Zyrën e Prokurorit Disiplinor nga Këshilli Gjyqësor dhe ai Prokurorial, duke mos e vënë atë as nën autoritetin e Ministrisë së Drejtësisë, por duke e shndërruar një agjenci të pavarur.

Për fund, Ministri Kuçi shtoi se ka shumë punë për të bërë për të arritur sistem edhe më funksional dhe se ka nevojë për një rishikim të tërësishëm të sistemit të drejtësisë në Kosovë. Gjatë këtij mandati ne veçanti do të bëhet vlerësimi i infrastrukturës ligjore dhe harmonizimi institucional.

Në këtë tryezë ka marrë pjesë edhe Shefi i Misionit të Bashkimit Evropian në Kosovë, Samuel Zbogar, Ambasadori i Holandës në Kosovë, Robert Bosch, Kryesuesi i Këshillit Gjyqësor të Kosovës, Enver Peci, gjyqtarë, prokurorë të gjykatave dhe prokurorive në Kosovë, të cilët e kanë vlerësuar këtë raport si shumë të rëndësishëm dhe njëherit janë zotuar për bashkëpunim dhe transparencë.