Në mbledhjen e saj të radhës, Qeveria e Republikës së Kosovës ka miratuar një sërë nismash të propozuara nga Ministria e Drejtësisë, të cilat synojnë forcimin e sistemit të drejtësisë dhe mbrojtjen e të drejtave të qytetarëve. Ministrja e Drejtësisë, Albulena Haxhiu, ka prezantuar dhe lexuar propozimet, të cilat përfshijnë:

Rishikimi i Strategjisë për Sundimin e Ligjit dhe Plani i Veprimit 2025-2026

Ky dokument strategjik përcakton pesë objektiva kryesore: (1) Gjyqësorin dhe prokurorinë efikase, profesionale dhe me integritet; (2) Fuqizimin e sistemit të Drejtësisë Penale; (3) Fuqizimin e sistemit të Drejtësisë Civile dhe Administrative; (4) Digjitalizimin e drejtësisë; dhe (5) Qasjen në drejtësi. Plani i Veprimit përmban 325 veprime konkrete për zbatim nga institucionet përkatëse.

Projekt-Rregullorja për Mekanizmin Koordinues Lokal për Mbrojtjen nga Dhuna në Familje dhe Dhuna në Baza Gjinore

Kjo rregullore përcakton përgjegjësitë e institucioneve lokale në mbrojtjen e viktimave të dhunës dhe rrit rolin e kryetarëve të komunave në këtë proces, duke siguruar koordinim më të fortë dhe mbështetje më efikase për viktimat.

Linja Telefonike Emergjente për Viktimat e Dhunës

Ky udhëzim administrativ parashikon krijimin e një linje telefonike të dedikuar për viktimat e dhunës, duke ofruar ndihmë të menjëhershme, këshillim dhe referim te shërbimet përkatëse.

Ndryshimi dhe plotësimi i Vendimit për Komisionin e Ankesave

Është miratuar emërimi i z. Xhemajl Pllana si anëtar i Komisionit të Ankesave të Komisionit Qeveritar për Njohjen e Statusit të ish të Burgosurve dhe të Përndjekurve Politik, duke siguruar funksionimin e rregullt të këtij mekanizmi.