Zëvendëskryeministri dhe Ministri i Drejtësisë, Prof. Dr. Hajredin Kuçi ka pritur sot një delegacion të Shoqatës së të Verbërve të Kosovës,  të kryesuar  nga Kryetari Bujar Kadriu. 

Drejtuesit e Shoqatës së të Verbërve në shenjë falënderimi dhe respekti për angazhimin personal dhe institucional të Zëvendëskryeministrit Kuçi dhe Qeverisë së Kosovës, në mbështetje të kërkesave dhe nevojave të këtij komuniteti, i kanë ndarë Zëvendëskryeministrit Kuçi një Mirënjohje.

Zëvendëskryeministri pasi ka falënderuar drejtuesit e Shoqatës së të Verbërve për këtë mirënjohje, ka ritheksuar përkushtimin e tij dhe të  Qeverisë së Kosovës, për të mbështetur dhe avancuar të drejtat e kësaj kategorie, duke iu ofruar mundësi të barabarta dhe integrim të plotë në shoqëri.

Të dyja palët e kanë vlerësuar si shumë të rëndësishëm miratimin nga ana e Qeverisë, Ligjin për të Verbëritë, i cili rregullon dhe mbron në mënyrë institucionale të drejtat e këtij komuniteti.

Duke e vlerësuar kontributin e Shoqatës së të Verbërve gjatë hartimit të këtij ligji të rëndësishëm, Zëvendëskryeministri ka shprehur bindjen se gjatë muajve të parë të vitit të ardhshëm,  ky ligj do të miratohet edhe në Kuvendin e Kosovës, në mënyrë që të krijohen të gjitha parakushtet që ky ligj të fillojë të implementohet në janar të vitit 2013.