Sipas sektorit privat, Ministria e Drejtësisë ka ndërmarrë hapa adekuat për kompletimin sa më të shpejtë të infrastrukturës ligjore sa i përket adresimit të çështjeve komerciale

Për një kohë të gjatë, bizneset avokojnë për miratim sa më të hershëm të këtij projektligji, në qëllim të adresimit të nevojave imediate të bizneseve, për sa i përket funksionimit të sistemit gjyqësor në zgjidhjen e çështjeve komerciale.

Moderatori i diskutimit, avokati Ardi Shita, mirëpriti z. Sallahu duke theksuar mirënjohjen ndaj Ministrisë së Drejtësisë dhe Qeverisë Kurti për adresimin e menjëhershëm të çështjeve të ndërlidhura me funksionalizimin e Gjykatës Komerciale dhe përcjelljen ekspeditive të këtij projektligji për miratim në Qeveri.

Gjatë diskutimit, zëvendësministri Sallahu theksoi ndikimin që kjo Gjykatë do ketë në zgjidhjen e lëndëve komerciale, shmangien nga korrupsioni dhe qasjen më të lehtë në drejtësi, duke rritur ndjeshëm numrin e gjyqtarëve dhe stafin përkatës si dhe duke përcaktuar procedura specifike me afate më të shkurtra për zgjidhjen e lëndëve të natyrës komerciale. Po ashtu, z. Sallahu potencoi rëndësinë e kësaj Gjykate në ekonominë e vendit përmes nxitjes së investimeve dhe rrjedhimisht kjo do të ketë impakt në rritje të punësimit.

Me kërkesë të sektorit privat dhe me gatishmërinë e shprehur nga z. Sallahu, u dakorduan që projektligji të miratohet në Kuvend sa më parë që të jetë e mundur.

Paralelisht me projektligjin për Gjykatën Komerciale, në një kohë të shpejtë Qeveria do miratojë edhe projektligjin për të Drejtën Ndërkombëtare Private që do adresojnë problematikën apo sfidat e personave privat, në këtë rast edhe bizneseve, në çështjet me element ndërkombëtar.

Përveç kësaj, Ministria e Drejtësisë do të përfundojë hartimin e Projektligjit për Ekspertiza Gjyqësore, e cila do të ndikojë në vlerësimin e saktë të vlerës së kontesteve dhe çështjeve tjera që ndërlidhen me vlerën e kontesteve komerciale.

Një infrastrukturë e tillë ligjore do kompletojë në një masë të caktuar pasqyrën e nevojshme ligjore për adresimin e nevojave të bizneseve.

Bizneset e Odës Ekonomike Amerikane mirëpresin miratimin e infrastrukturës ligjore të lartpërmendur kurse Zëvendësministri i Drejtësisë, z. Sallahu i ka ftuar të gjithë përfaqësuesit e organizatave dhe institucioneve relevante që të vazhdojnë të kontribuojnë që kjo infrastrukturë ligjore të jetë sa më e kompletuar, me qëllim të jetësimit të interesave të mirëfillta të bizneseve.