Zëvendëskryeministri dhe Ministri i Drejtësisë, Prof. Dr. Hajredin Kuçi, sot ka pritur në takim Komandantin e ri të KFOR-it, Gjeneralin Salvatore Farina, të cilit i ka uruar suksese në detyrën dhe misionin e ri, duke shtuar se suksesi i këtij misioni është edhe sukses për Kosovën.

Duke vlerësuar rolin e KFOR-it, si partner i rëndësishëm në ruajtjen e paqes dhe stabilitetit në Kosovë, Zëvendëskryeministri Kuçi i ka ofruar Gjeneralit Farina bashkëpunimin e plotë të Qeverisë së Kosovës në përmbushjen me sukses të këtij misioni. Komandanti i ri i KFOR-it, pasi ka falënderuar Zëvendëskryeministrin Kuçi për pritjen, shprehu përkushtimin  dhe gatishmërinë e tij për të punuar së bashku në garantimin e një ambienti të qetë dhe të sigurt për të gjithë qytetarët dhe gjithë territorin e Kosovës.

Të dy bashkëbiseduesit e kanë dënuar fuqishëm  aktin e vrasjes së doganierit të EULEX-it, dhe kanë kërkuar angazhimin dhe bashkëpunimin e të gjitha institucioneve vendore dhe ndërkombëtare me qëllim që autoret e vrasjes të dalin para drejtësisë.
Zëvendëskryeministri Kuçi e ka falënderuar Gjeneralin Farina edhe për mbështetjen e vazhdueshme dhe të gjithanshme që po jep KFOR-i rreth zhvillimit dhe ndërtimit të Forcës së Sigurisë së Kosovës dhe e inkurajoi që ta thellojnë edhe më shumë këtë bashkëpunim në mënyrë që kjo forcë të arrijë standardet ndërkombëtare.